Навіны

6 лістапада 2025

Сёння, напярэдадні Дня Кастрычніцкай рэвалюцыі, у райцэнтры ўрачыста адчынілі будынак аддзела запісу актаў грамадзянскага стану Чашніцкага райвыканкама.

У цырымоніі адкрыцця прынялі ўдзел начальнік галоўнага ўпраўлення юстыцыі Віцебскага аблвыканкама Сяргей Канапелька, намеснік старшыні Віцебскага аблвыканкама Вячаслаў Дурноў, кіраўніцтва раёна, супрацоўнікі аддзела загса, прадстаўнікі грамадскасці.

Пасля цёплых слоў прывітання Сяргей Пятровіч разам з Вячаславам Віктаравічам, кіраўніком раёна Дзмітрыем Станкевічам і начальнікам аддзела загса Наталляй Папелковай перарэзаў чырвоную стужку.

Сярод ганаровых гасцей былі муж і жонка Сушковы Андрэй Валер'евіч і Святлана Георгіеўна, сямейная пара, якая пражыла ў шлюбе 35 гадоў. Менавіта ім было дадзена права першымі ўвайсці ў новы будынак загса і прайсці па галоўнай зале, каб сваёй прысутнасцю, мудрасцю і непахіснай вернасцю напоўніць яго асаблівай аўрай кахання і шчасця.

У рамках урачыстасці адбылося святкаванне каралавага вяселля мужа і жонкі Сушковых. Юбіляраў павіншаваў кіраўнік абласной юстыцыі, падкрэсліўшы важнасць сямейных традыцый і каштоўнасцей.