Навіны

Сёння адбылася апошняя сёлета сустрэча абласной групы па прававой асвеце з працоўным калектывам горадаўтваральнага прадпрыемства - ААТ "Віцебскхлебпрам". Узначаліў яе начальнік галоўнага ўпраўлення юстыцыі Віцебскага аблвыканкама Сяргей Канапелька.

Размаўляючы з калектывам, ён адзначыў: «Асноўная задача нашай групы — даць работнікам вашага прадпрыемства магчымасць атрымаць адказы на пытанні прававога характару. Сёння тут прысутнічаюць прадстаўнікі ўпраўлення юстыцыі, натарыята, адвакатуры, абласнога аб'яднання арганізацый прафсаюзаў, камітэта па працы, занятасці і сацабароне насельніцтва аблвыканкама і іншыя. Вы можаце задаваць пытанні падчас сустрэчы ці атрымаць індывідуальныя кансультацыі пасля яе». Таксама Сяргей Пятровіч адзначыў, што старшынёй аблвыканкама зацверджаны план работы абласной прававой групы на наступны год, згодна з якім прававая асвета працягнецца ў іншых горадаўтваральных прадпрыемствах рэгіёна.

У час пасяджэння аб асаблівасцях правядзення выбараў дэпутатаў, адзіным дні галасавання прысутным расказаў намеснік начальніка галоўнага ўпраўлення - начальнік аддзела па сувязях з грамадскасцю і ўзаемадзеянні са сродкамі масавай інфармацыі галоўнага ўпраўлення ідэалагічнай работы і па справах моладзі аблвыканкама Анатоль Гуцуляк. Ён звярнуў увагу на тое, што ўпершыню мы будзем выбіраць аднамомантна дэпутатаў усіх узроўняў, ад Палаты прадстаўнікоў да сельскіх і пасялковых саветаў. Нягледзячы на тое, што адзіны дзень галасавання — з'ява для нас новая, многія нормы захаваліся. У агульнай складанасці будзе абрана 12 624 дэпутаты. З іх 110 - Палаты прадстаўнікоў Нацыянальнага сходу.

Галоўны прававы інспектар Віцебскага абласнога аб'яднання прафсаюзаў Святлана Супрунчук расказала аб навацыях у працоўным заканадаўстве ў новым годзе. Напрыклад, змяненні закрануць сем'і, дзе трое і больш дзяцей да 16 гадоў або ёсць дзіця-інвалід да 18 гадоў. «Артыкул 265 Працоўнага кодэкса сёння дае права такім бацькам браць адзін раз у тыдзень вольны ад працы дзень. Аднак з 1 студзеня 2024 года заканадаўствам будзе давацца варыятыўнасць - узяць адзін дзень у тыдзень або скараціць на гадзіну працоўны дзень. Але выключна па ўзгадненні з наймальнікам і пры ўмове, што гэта не будзе перашкаджаць нармальнай працы арганізацыі», - сказала Святлана Русланаўна.

З навінамі зямельнага заканадаўства калектыў пазнаёміла начальнік аддзела прававой, кадравай работы і справаводства ўпраўлення землеўпарадкавання аблвыканкама Наталля Махонь. Паводле слоў Наталлі Уладзіміраўны, новы Кодэкс аб зямлі дае магчымасць спрасціць шэраг зямельных працэдур, стымулюе набыццё надзелаў і садзейнічае далейшаму навядзенню парадку на зямлі. Тэма выклікала жывую цікавасць у работнікаў прадпрыемства. Яны задавалі пытанні, цікавіліся, якая адказнасць за парушэнні межаў зямельных участкаў і як іх узаконіць, што будзе з самавольным будаўніцтвам і як яго легалізаваць і шмат іншага.

Пасля завяршэння сустрэчы прайшлі прававыя кансультацыі.

У рамках візіту сябры абласной групы з цікавасцю азнаёміліся з вытворчасцю. Спецыялісты прадпрыемства расказалі аб мадэрнізацыі, аб'ёмах выпускаемай прадукцыі і калектыве хлебапёкаў, кандытараў.