Навіны

Інтэлігентную, усмешлівую і неверагодна сціплую жанчыну ў галоўным упраўленні юстыцыі ведаюць многія, бо рабоце ў гэтай структуры яна аддала без малога трыццаць гадоў. Большую частку працоўнай дзейнасці Галіна Шарко прысвяціла прававой прапагандзе і прававому выхаванню грамадзян. Апошнія некалькі гадоў перад адыходам на заслужаны адпачынак яна працавала галоўным спецыялістам сектара арганізацыйна-кадравай работы галоўнага ўпраўлення юстыцыі.
Так, зараз Галіна Дзмітрыеўна знаходзіцца на пенсіі, але гэта ніколькі не перашкаджае ёй працягваць актыўны лад жыцця, з'яўляючыся сакратаром першаснай ветэранскай арганізацыі - адной з самых згуртаваных і актыўных у горадзе. У яе склад уваходзяць такія ж, як і Галіна Дзмітрыеўна людзі: спагадлівыя, моцныя, валявыя, неабыякавыя да гісторыі і лёсу пакаленняў, тыя, хто прайшоў доўгі працоўны шлях і ўнёс значны ўклад у развіццё і папулярызацыю прававых ведаў Віцебскага рэгіёну.
У юбілейны дзень нараджэння прысутныя не стрымлівалі ў адрас Г.Д. Шарка віншавальных слоў і прыгожых эпітэтаў. Некаторыя з іх прачыталі вершы ўласнага сачынення, іншыя выказаліся ў прозе. Па словах старшыні ветэранскай пяршоўкі Віктара Праніка, Галіна Дзмітрыеўна Шарко ўвесь свой працоўны і жыццёвы шлях прайшла з гонарам і годнасцю, павагай навакольных людзей.
Нарадзілася яна ў в. Церахава Віцебскага раёна ў шматдзетнай сям'і. Галіна Дзмітрыеўна была шостым дзіцем: у іх сям'і ўжо падрасталі трое хлопчыкаў і дзве дзяўчынкі. Прайшоўшы школьнае навучанне, юная Галіна патрапіла на працу ў суд Віцебскага раёна ў якасці судовага выканаўцы. Працуючы, яна паралельна атрымала вышэйшую адукацыю, навучаючыся завочна на юрыдычным факультэце Беларускага дзяржаўнага ўніверсітэта імя У.І. Леніна. Сваё юрыдычнае станаўленне прайшла ў адным з гарадскіх будтрэстаў. Атрымаўшы неабходныя прафесійныя навыкі, яна ўладкавалася ў тады яшчэ аддзел юстыцыі. Працавала Г.Д. Шарко на розных пасадах, па-рознаму яны называліся, але асноўная яе дзейнасць была звязана з прававой прапагандай і кадыфікацыяй заканадаўства. У многім дзякуючы намаганням Галіны Дзмітрыеўны ў Віцебскай вобласці паспяхова працавала каардынацыйная метадычная рада па пытаннях прававой прапаганды, яна цесна супрацоўнічала са сродкамі масавай інфармацыі, а таксама, знаходзячыся на пасадзе галоўнага спецыяліста сектара арганізацыйна-кадравай работы, унесла вялікі ўклад у кадравае забеспячэнне галоўнага ўпраўлення юстыцыі аблвы.
Як адзначыў Віктар Віктаравіч, Галіна Дзмітрыеўна паказвала прыклад добрасумленных адносін да справы на ўсіх участках работы, праяўляла высокія асабістыя, прафесійныя якасці, прынцыповасць і адказнасць за даручаны ўчастак работы.

За гэта яна набыла павагу і пашану сярод калег. Акрамя таго, за сваю добрасумленную працу Галіна Дзмітрыеўна не раз была ўзнагароджана рознымі граматамі і падзякамі галоўнага ўпраўлення юстыцыі, аблвыканкама, Міністэрства юстыцы. У 2009 годзе Г.Д. Шарко ўзнагародзілі Ганаровай граматай Савета Міністраў Рэспублікі Беларусь, яна з'яўляецца ганаровым работнікам органаў юстыцыі, мае нагрудны знак "За адзнаку" (2-й ступені), яе імя занесена ў Кнігу гонару Міністэрства юстыцыі Рэспублікі Беларусь.


Не абышлося без узнагарод і на гэты раз. Ад імя дзеючага калектыву галоўнага ўпраўлення юстыцыі Віцебскага аблвыканкама Галіну Дзмітрыеўну павіншавала першы намеснік начальніка Марына Быкава. «Вы на працягу доўгага часу паспяхова вялі прававую асвету, працуючы ва ўпраўленні юстыцыі, выдатна спраўляліся з задачамі, якія стаялі перад вамі, як перад спецыялістам арганізацыйна-кадравай працы. З вашым меркаваннем лічацца і цяпер, звяртаюцца па парады, вас цэняць і паважаюць. Усяго гэтага вы дасягнулі дзякуючы шматгадовай працы, адказнасці, стараннасці. Прыміце самыя шчырыя віншаванні з юбілейным днём нараджэння! Мы ўпэўненыя, што ваша актыўная жыццёвая пазіцыя, досвед будуць, па-ранейшаму запатрабаваныя. Здароўя вам, дабрабыту, святочнага настрою!», - адзначыла Марына Фёдараўна і ўручыла Ганаровыя граматы Міністэрства юстыцыі Рэспублікі Беларусь і галоўнага ўпраўлення юстыцыі.

Ганаровую грамату Віцебскага аблвыканкама Г.Дз. Шарко ўручыла старшыня пярвічнай арганізацыі грамадскага аб'яднання ветэранаў аблвыканкама Зоя Крот. Падзячны ліст адміністрацыі Кастрычніцкага раёна г. Віцебска Галіне Дзмітрыеўне ўручыла старшыня Кастрычніцкай раённай арганізацыі Беларускага грамадскага аб'яднання ветэранаў Наталля Ляпёшкіна.
У сваю чаргу Галіна Дзмітрыеўна Шарко падзякавала ўсім прысутным за арганізаванае мерапрыемства, увагу і выдатныя, кранальныя словы, выказаныя ў яе адрас, за высокую ацэнку дзейнасці, за ўсе ўзнагароды, якія яна атрымала ў гэты юбілейны дзень.

У завяршэнні мерапрыемства прысутныя зрабілі агульнае фота на памяць.