Сёння намеснік Міністра юстыцыі Алег Кот з працоўнай паездкай пабываў у Докшыцкім раёне. У рамках свайго візіту Алег Мікалаевіч правёў рабочую нараду з кіруючым складам ведамасных падраздзяленняў, на якой заслухаў кожнага прадстаўніка структур і паставіў пэўныя задачы.
Сумесна з начальнікам галоўнага ўпраўлення юстыцыі Віцебскага аблвыканкама Сяргеем Канапелькам ён таксама наведаў шэраг ведамасных аб'ектаў.
Пабываўшы ў аддзеле прымусовага выканання, натарыяльнай канторы, юрыдычнай кансультацыі, службе "адно акно", аддзеле загс Докшыцкага райвыканкама, раённым архіве Алег Мікалаевіч вывучыў умовы працы, тэхнічнае забеспячэнне службовай дзейнасці, якасць працы супрацоўнікаў, пацікавіўся праблемнымі пытаннямі. Намеснік міністра звярнуў увагу на неабходнасць пастаяннага павышэння ўзроўню прафесійных навыкаў, захаванне дысцыпліны. Кіраўнік нацэліў усіх на плённую работу, каб дасягнуць мэт і задач, пастаўленых Міністэрствам юстыцыі Рэспублікі Беларусь.