Навіны

Сёння ў Рэгіянальным цэнтры прававой інфармацыі Віцебскай вобласці адбыўся абласны семінар для кіраўнікоў і спецыялістаў службаў "адно акно" гарадскіх і раённых выканаўчых камітэтаў, а таксама адміністрацый раёнаў г. Віцебска.

Мерапрыемства было прысвечана актуальным пытанням ажыццяўлення адміністрацыйных працэдур, рабоце са зваротамі грамадзян і павышэнню якасці абслугоўвання насельніцтва.

Семінар прайшоў пад кіраўніцтвам першага намесніка начальніка галоўнага ўпраўлення юстыцыі Віцебскага аблвыканкама Марыны Быкавай і дырэктара Рэгіянальнага цэнтра прававой інфармацыі Віцебскай вобласці Ларысы Дараговай.

З прывітальным словам да ўдзельнікаў звярнулася Марына Фёдараўна. Яна падкрэсліла значнасць пастаяннага прафесійнага ўзаемадзеяння і абмену практычным вопытам, а таксама падвяла вынікі работы службаў за першае паўгоддзе, асобна адзначыўшы іх актыўнае асвятленне сваёй дзейнасці ў сродках масавай інфармацыі.

Праграму семінара адкрыла выступленне ў фармаце відэаканферэнцсувязі начальніка ўпраўлення метадалогіі абароны персанальных даных Нацыянальнага цэнтра абароны персанальных даных Рэспублікі Беларусь Ірыны Пырко. Спецыяліст растлумачыла асаблівасці прымянення профільнага заканадаўства пры ажыццяўленні адміністрацыйных працэдур, падрабязна разабрала тыповыя памылкі пры апрацоўцы персанальных даных і дала практычныя рэкамендацыі па рабоце з кантактнымі звесткамі грамадзян і копіямі дакументаў, якія пацвярджаюць асобу.

Арганізацыйныя аспекты дзейнасці службаў "адно акно" асвятліла кансультант упраўлення метадалогіі ажыццяўлення адміністрацыйных працэдур Міністэрства юстыцыі Рэспублікі Беларусь Юлія Салановіч. У сваім дакладзе яна спынілася на выніках маніторынгаў, праведзеных прадстаўнікамі Мінюста ў Віцебскім рэгіёне, і прааналізавала паўнату і актуальнасць інфармацыі, размешчанай на афіцыйных сайтах райвыканкамаў.

Практычным метадам работы ў дзяржаўных інфармацыйна-пошукавых сістэмах "ЭТАЛОН" і "ЭТАЛОН-ONLINE" прысвяцілі свае выступленні дырэктар Рэгіянальнага цэнтра прававой інфармацыі Віцебскай вобласці Ларыса Дарогава і спецыяліст цэнтра Дзмітрый Кучарэнка. Яны расказалі пра афіцыйныя крыніцы прававой інфармацыі і адказалі на ключавыя пытанні выкарыстання рэсурсаў.

Урачыстым момантам сустрэчы стала ўручэнне Падзякі Міністэрства юстыцыі Рэспублікі Беларусь галоўнаму спецыялісту аддзела па рабоце са зваротамі грамадзян і юрыдычных асоб Сенненскага райвыканкама Жанне Маханьковай - за шматгадовую добрасумленную працу, высокі прафесіяналізм і значны ўклад у развіццё службы "адно акно".

Заключным этапам мерапрыемства стала паспяховае праходжанне ўдзельнікамі тэставых заданняў на веданне функцыяналу сістэм "ЭТАЛОН", "ЭТАЛОН-ONLINE" і іншых дзяржаўных інфармацыйна-прававых рэсурсаў, па выніках якога спецыялістам былі ўручаны сертыфікаты.