Навіны

10 лістапада 2023

ААТ "Амкадор-КЭЗ" — адзінае ў Беларусі прадпрыемства, якое вырабляе меліярацыйныя машыны і аднакаўшовыя гідраўлічныя экскаватары на гусенічным і колавым ходзе. У гэтым асабіста маглі пераканацца члены абласной групы па прававой асветы, якую ўзначаліў начальнік галоўнага ўпраўлення юстыцыі Віцебскага аблвыканкама Сяргей Канапелька.

Прадпрыемства знаходзіцца на тэрыторыі Прамысловай зоны гарадскога пасёлка Коханава ў Талачынскім раёне. Сёння тут працуюць больш за 160 чалавек. У асноўным гэта мясцовыя жыхары. Іх сярэдняя заработная плата складае без малога 2 тысячы беларускіх рублёў. Як адзначыў дырэктар прадпрыемства Аляксандр Казлоў, уключэнне завода ў склад холдынгу ААТ "Амкадор" стала новым этапам дзейнасці завода. Цяпер тут таксама вырабляюць бульдозеры, тэлескапічныя пагрузчыкі, ачышчальнікі каналаў і касілкі.

У час наведвання ААТ, прадстаўнікі групы не толькі пазнаёміліся з вытворчасцю і ўмовамі працы, але і пагутарылі з работнікамі.

Па традыцыі Сяргей Канапелька растлумачыў прысутным мэты візіту на горадаўтваральнае прадпрыемства, прадставіў членаў групы.

Дырэктар Рэгіянальнага цэнтра прававой інфармацыі Віцебскай вобласці Ларыса Дарогава расказала аб асноўных дзяржаўных інфармацыйна-прававых рэсурсах. Яна адзначыла, што ў Беларусі сфарміравана дзяржаўная сістэма прававой інфармацыі, у рамках якой дакладна наладжаны працэс руху прынятых або выдадзеных прававых дакументаў ад дзяржаўных органаў да тых, каму неабходна азнаёміцца з імі і прытрымлівацца іх у сваёй дзейнасці і паўсядзённым жыцці. Так, у глабальнай сетцы прававую інфармацыю можна знайсці на такіх дзяржаўных інфармацыйна-прававых рэсурсах, як: Нацыянальны прававы Інтэрнэт-партал Рэспублікі Беларусь pravo.by, Дзіцячы прававы сайт mir.pravo.by, Прававы форум Беларусі forumpravo.by, пошукавая сістэма па заканадаўстве «ЭТАЛОН-ONLINE» etalonline.by. Для тых, у каго няма магчымасці скарыстацца Інтэрнетам, функцыянуе сістэма «ЭТАЛОН». Акрамя таго, на базе гарадскіх, раённых, сельскіх бібліятэк функцыянуюць публічныя інфармацыйныя прававыя цэнтры, якія даюць свабодны доступ да заканадаўства.