Навіны

14 кастрычніка 2022

На базе вучэбна-аздараўленчага комплексу "Форум" адбыўся вучэбна-метадычны збор з кіраўнікамі тэрытарыяльных органаў прымусовага выканання. Сустрэча Міністэрства юстыцыі з 69 кіраўнікамі органаў прымусовага выканання Віцебскай, Мінскай абласцей і Мінска праходзіла ў фармаце адкрытага дыялога.

Наведаў навучальна-аздараўленчы комплекс і міністр юстыцыі Сяргей Хаменка.

- Мэтай гэтых збораў з'яўляецца дабіцца адзінага разумення ўсімі судовымі выканаўцамі, кіраўнікамі органаў прымусовага выканання парадку рэалізацыі тых патрабаванняў, якія прад'яўляе Кіраўнік дзяржавы, кіраўніцтва Урада нашай краіны да гэтай катэгорыі дзяржслужачых, - падкрэсліў Сяргей Хаменка. - Характэрна, што ў такіх сустрэчах бяруць удзел і ўзаемадзейныя структуры: прадстаўнікі пракуратуры, Следчага камітэта і ўнутраных спраў.

Так, тэмай мерапрыемства стала ўдасканаленне арганізацыі і кантролю работы тэрытарыяльных органаў прымусовага выканання, а таксама практыка прымянення заканадаўства і запланаваныя змяненні.

- Згодна з планам, зацверджаным міністрам юстыцыі, мы праводзім міжрэгіянальныя вучэбна-метадычныя зборы. Тут абмяркоўваем, якія заканадаўчыя і працэсуальныя моманты трэба ўдасканаліць для таго, каб працэс па выканаўчых вядзеннях стаў больш эфектыўным і аператыўным, - растлумачыў начальнік галоўнага ўпраўлення прымусовага выканання Міністэрства юстыцыі Сяргей Нікель.

На працягу двух дзён прысутныя абмяркоўвалі такія актуальныя пытанні, як вышук транспартных сродкаў, парадак аб'яўлення даўжнікоў у вышук і парадак устанаўлення яго месцазнаходжання. Паводле слоў Сяргея Нікеля, у ходзе адкрытага дыялога ўдалося прапрацаваць канкрэтныя механізмы, якія будуць накіраваны на павышэнне эфектыўнасці работы ў гэтым напрамку.

Намеснік міністра юстыцыі Сяргей Каліноўскі зазначыў, што на тэрыторыі Міншчыны прайшоў трэці, заключны этап вучэбна-метадычных збораў.

- Падчас мерапрыемства нам удалося абмеркаваць перспектывы інфармацыйнага і лічбавага развіцця прымусовага выканання. На гэты момант распрацоўваецца інфармацыйны рэсурс, які дасць новыя рэзервы для дзейнасці судовых выканаўцаў і аблегчыць іх задачу пры выкананні выканаўчых дзеянняў, - сказаў ён. - Вельмі важна вызначыцца з тым, што трэба для судовага выканаўцы, каб ён якасна і своечасова выконваў пастаўленыя задачы.

Тэкст: Валерыя ГРАМОВІЧ

Фота: Валерыя ГРАМОВІЧ

"Прысталічча"